Sampe Jua Basudara eee.....

Beta skarang ni mo stori sadiki tentang apa yang ada biking beta hati garu-garu. Beta kira samua ni su selesai. Oke, beta tau balom sepenuhnya selesai tapi paleng kurang ada tado sadiki. Sampe tadi pagi waktu beta bilang mau pulang ka Luhu lewat darat dari Piru, ada yang larang. Dong bilang, kemaren ada kejadian lai. Jang beta bilang lai kejadiannya apa dan dimana karena bukan itu inti yang bikin beta galisah.

Beta cuma mo tanya par dong samua, apa yang bisa katong bikin supaya katong bisa maso kaluar kombali deng bebas. Beta seng mau bicara sejarah, seng mau bicara fakta. Karena beta seng tau dari sejarah yang beta dengar, dari carita dolo dolo yang orang orang bacarita, beta seng tau mana yang benar mana yang salah.Dan kalo pun dapa tau sapa yang benar dan sapa yang salah, lalu mo apa? Yang beta deng katong samua parlu itu kan cuma damai jua basudara eee......

Beta orang Luhu, tapi Iha tu jua beta pung negeri. Kalo tarus bagini jua, beta sedih. Lalu sapa yang sanang par akang? Orang Iha deng Luhu kalo mo ka Piru, musti ka Ambon dolo. Atau pake katinting ka Katapang atau Lokki, kalo mo nekat, musti pake pengawalan brimob. Sioooo, seng siksa diri itu?

Itu saja yang beta pastiu deng akang. Jang katong cari salah deng batul lai. Jang katong inga dolo dolo lai. Katong pikir skarang jua, katong saling butuh, katong saling parlu. Buka diri jua. Baku kasi maaf jua. Jang tunggu satu minta maaf lai, maar sama sama kasi maaf jua. Jang katong baku batahang deng model bagini. Katong sandiri yang susah, bukan orang laeng. Voor basudara basudara yang baca catatan ini, beta yakin katong samua rindu par bale bae-bae ulang. Memang katong seng rasa akang dampak langsung tapi yang rasa langsung tu katong basudara di hena yang akang nama "saki di kuli, rasa di daging".

Bilang par katong orang tatua, katong basudara di hena, jang katong baku tahang gengsi lai, jang baku tahang ego lai. Masa katong mo wariskan dendam, wariskan permusuhan par ana cucu. Gara-gara katong skarang, anana kacil di hena sana seng bisa skola bae-bae, abis itu, beso-beso dong bale musti lanjutkan katong pung baku tar suka ini lai. Katong seng mau bagitu to.

Jadi mari katong bapikir bae-bae jua, katong bisa apa par bikin bae negeri ini deng cara paleng sederhana yang katong bisa. Supaya apa? Supaya samua sanang. Beta cuma rindu bisa pi ka Luhu kombali deng sanang, seng ada was-was. Lalu sampe Luhu, beta bisa pi maeng maeng ka Iha, beta pung negeri lai. Mangente beta pung basudara Waliulu di Iha, basudara Putuhena, basudara Pattiiha, basudara Pikahulan, basudara Samal, basudara Kaisupy, beta pung basudara samua di negeri Iha.